БиХ не е подготвена за членство во ЕУ

Босна и Херцеговина не ги исполнила критериумите за членство во Европската унија, и 28-те земји членки на ЕУ се далеку од договор да ја прифатат поранешната југословенска република, изјавија дипломатите во Брисел, откако Сараево објави дека ќе поднесе барање за членство во ЕУ следниот месец, пренесува БТА.

Политички децентрализирана по етнички линии по војната во 90-те години, во која беа убиени околу 100.000 луѓе и настана економска криза, Босна и Херцеговина заостанува зад балканските соседи на патот кон пристапот во ЕУ, забележува БТА.

Дипломатите на ЕУ изјавија дека БиХ не ги остварила сите реформи кои се потребни за членство во ЕУ и членките на ЕУ се далеку од договор да поддржат било какво барање, без кое холандското претседателство тешко дека ќе ја стави на маса.

Според оценките направени во ноември 2015 година за усогласеноста со нормите и стандардите на ЕУ, утврдено е дека Босна и Херцеговина треба да направи уште многу реформи како промена на уставот, реформи во судството и економијата, борбата против корупцијата, почитување на човековите права и слободата на говорот.