Ципрас ја повика Турција да ја изостави агресивната реторика

Грчкиот премиер Алексис Ципрас ја повика Турција да ја изостави агресивната политика и да пристапи сериозно и одговорно кон преговорите за решавање на кипарското прашање, пишува весникот „Нафтемборики“.

- Без да сме прекумерни оптимисти, разумно и одговорно продолжуваме да работиме интензивирано за решавање на кипарското прашање, рече Ципрас во Парламентот.

Тој нагласи дека претпоставка за успех на тој процест е Турција да пристапи кон преговорите за Кипар со позитивен дух и да ја остави настрана агресивната реторика.

- Женевската конференција продолжува на експертско, дипломатско ниво. Владата на Грција продолжува да соработува со Владата на Кипар и претседателот Никос Анастасиадис во рамки на интензивните напори преземени од нив, за да се пронајде праведно и суштинско решение на проблемот, без гаранции и преку повлекување на турските војски од островот, рече Ципрас.

Тој напомена дека првпат на тие преговори меѓу двете заедници на островот биле разменети мапи со територијални обележја, иако несогласувањата меѓу нив остануваат.

Ципрас го означи како голем дипломатски успех тоа што на дневен ред на преговорите била поставени прашања за гаранциите и безбедноста на Кипар.