Дали повисоки казни ќе спречат трагедии како Кочани?

Собранието целосно забрани употреба на пиротехника во затворени простории. 

Законот по скратена постапка доцна синоќа доби поддршка од 83 пратеници и од власта и од опозицијата. 

Двојно се зголемуваат и казните. Тој што ќе запали огномет, факел или друг вид на пиротехника, ќе заработи казна од 200 до 250 евра, одговорниот на фирмата 500 евра, додека казните за фирмата ќе се движат од илјада до 10 илјади евра. За повторување на прекршокот предвиден е и притвор.

Десеткратно се зголемија и казните за пропуштање малолетници после полноќ, од досегашните 50 евра, сега казните се движат од 500 до 5000 евра во зависност од големината на објектот. 

Според професорката по казнено право Александра Груевска Дракулевски, зајакнатите казни ќе ја зголемат безбедноста на граѓаните, но само ако надлежните инстутции ефикасно ги применуваат.

Законските измени се иницирани од трагедијата во Кочани во која загинаа 59 лица. Пожарот го предизвикаа пиротехнички фонтани, а иако два часа по полноќ, во пожарот загинаа и малолетници кои според закон воопшто не смееле да бидат присутни во дискотеката.

По несреќата, се подготвува и целосно нов Закон за пожарникарска служба, кој ќе ги зајакне капацитетите и со опрема и со кадар на сите противпожарни единици, со приоритет на Кочани каде во моментов работат двојно помалку пожарникари од потребното.