ЈОРСМ: Преземени сите списи во врска со постапките за утврдување одговорност на судии кои постапувале во „Таргет-Тврдина“

Постапувајќи по предметот оформен по назначувањето на две лица на т.н. „црна листа“ на САД, Основното јавно обвинителство Скопје информира дека се преземени дејствија во рамките на кои истражител од Истражниот центар на обвинителството ги побарал и презел од Судскиот совет сите списи во врска со постапките за утврдување одговорност на судии кои постапувале во предметот познат во јавноста како „Таргет-Тврдина“. 

Од ЈОРСМ посочуваат дека се преземаат и други дејствија за целосно испитување на настанот.

Државниот јавен обвинител Љупчо Коцевски, на брифинг со медиумите завчера, информираше дека оформил предмет за обезбедување докази за евентуална кривична одговорност за лицата ставени на црната листа на САД. 

- Со оглед на сериозноста на наводите поради кои наведените лица беа назначени на листата, ги искористив своите овластувања и уште вчера оформив предмет со цел да се обидеме да обезбедиме докази со кои ќе ја провериме евентуалната кривична одговорност на лицата кои се доведуваат во врска со дејства на поткуп и трговија со влијание, истакна Коцевски на брифинг со новинарите.

Американскиот Стејт департментот во понеделникот ги стави на „црна листа" поранешниот вицепремиер Артан Груби и апелациониот судија Енвер Беџети.

Вчера, Јавното обвинителство потврди дека полициски службеници по наредба на Основното јавно обвинителство (ОЈО) Скопје влегле во Судскиот совет за да ги обезбедат записниците и во врска со сомнежите за евентуално сторено кривично дело поврзано со мандатот на претседателката на Судски совет, Весна Дамева, која поднесе оставка на 2 декември.