Македонија
3. August 2020 - 16:46

Кој седнува во пратеничко столче, партиски послушници или штитеници на граѓанските интереси

Гласачка машина на партиските раководства или пратеници со свој став? Во удобните собраниски фотелји утре за првпат ќе седнат голем број нови лица, кои ќе го сочинуваат 10-от парламентарен состав.

Нивното неискуство е проблематично по повеќе основи, вели Александар Кржаловски од македонскиот центар за меѓународна соработка. Тој оценува дека уште пред да седнат во пратеничките столчиња направиле неколку грешки. Не се појавија во ДИК за лично да ги земат освоените мандати, а не покажаа храброст ниту да покренат иницјатива пред да ги повика партискиот лидер.

“Од друга страна повеќе нови лица носат свежина, иако кај нас е девалвирана професијата и суштината на парламентот поради партиските линии, односно лојалноста кон партијата и лидерот пред се, наспроти интересите на граѓаните кои ги избрале. Во таа смисла, вака со многу нови пратеници додека се ориентираат во просторот и стигнат до своето јас, да се слушне нивниот глас и почитува, мислам дека ќе помине првиот нивен мандат.”

Партиите често ги менуваат изборните листи но и самото дејствување токму за да има помала независност, а повеќе партиска лојалност. Моќта на лидерите во големите партии е пречка за вистинска демократија во македонскиот парламент, смета Кржаловски.

“Дополнителен проблем се статутите на партиите каде што се е во рацете на лидерот. Еве ВМРО ДПМНЕ нешто променија, но според критиките суштински ништо не е сменето. И се додека е така, а исто и во СДСМ и во ДУИ каде што доминира лидерот, не можеме да очекуваме вистинска демократија во парламентот”

Според првиот човек на МЦМС, во ситуација на пандемија, крајно неодговорна е лежерноста на партиите при формирањето на влада и институции.

“Ако се инсистираше изборите да се одржат порано, тогаш не гледам никаква причина зошто да немаме функционална влада, нема никаква причина да се чека последниот рок”

79 мажи и 41 жена утре ќе го официјализираат новиот парламентарен состав. За разлика од минатиот, во него ќе има четири жени помалку и покрај залагањето на повеќето политички партии за родова еднаквост.

Од коалицијата Можеме предводена од СДСМ во новиот собраниски состав влегуваат 28 мажи и 18 жени. 27 пратеници и 17 пратенички доаѓаат од ВМРО-ДПМНЕ, мнозинство мажи ќе го претставуваат и ДУИ - 11 наспроти четири жени, а преостанатите две пратенички беа избрани од коалицијата Алијанса и Алтернатива.