Ковачевски: Во однос на безбедносната состојба во државата, граѓаните може да се спокојни

Настаните кои се случија денес силно ги осудувам, и изразувам целосна поддршка на КФОР за сите идни активности кои се во насока на гарантирање на мирот и стабилноста во Косово и регионот. Со голема загриженост ја следиме ситуацијата во Косово, и сме во постојана комуникација и координација со нашите сојузници и стратешки партнери, објави премиерот Димитар Ковачевски синоќа на својата Фејсбук страница.

- Во однос на безбедносната состојба во државата, граѓаните може да се спокојни - таа е стабилна, без никакви индикации за можни нарушувања. Сите институции задолжени за безбедноста будно ја следат состојбата. Воедно согласно информациите споделени помеѓу безбедносно разузнавачките служби во земјата како и информациите добиени од службите на нашите сојузници во НАТО алијансата, не постојат индиции кои укажуваат на нарушување на безбедноста во Северна Македонија, наведува премиерот во објавата.

Тој апелира за деескалација на настаните во Косово и за продолжување на дијалогот и решавање на сите отворени на мирен и демократски начин.

- Клучно е забрзувањето на евроатлантските интеграции на Западен Балкан, тоа е единствениот начин за обезбедување напредок и стабилност во регионот, како и намалување на влијанието на дестабилизирачки трети страни. Регионот мора да оди напред, граѓаните заслужуваат просперитет, подобра иднина и подобар животен стандард, наведува Ковачевски.