Масовни тестирања во поширокиот регион на грчкиот град Ксанти

За елиминирање на континуираните позитивни случаи на Ковид-19 во поширокиот регион на грчкиот град Ксанти, од денеска напладне, до сабота, 15 мобилни единици во десет општини ќе вршат масовно тестирање на населението, јави дописничката на МИА од Атина.

Одлуката, како што соопштија од Секретаријатот за цивилна заштита на Грција, била донесена доцна синоќа на вонредниот состанок на заменик-министерот за цивилна заштита Никос Хардаљас со професорот епидемиолог надлежен за Ковид-19, Сотирис Циодрас и претседателот на Националната организација за јавно здравје Панајотис Аркуманеас, а на кој присуствувале и префектот на конкретната периферија и градоначалниците на општините во кои што ќе се врши тестирањето.