Милевски достави илјада амандмани на Законот за нотаријат

Пратеникот Горан Милевски денеска до Собранието достави илјада амандмани на Предлог - законот за нотаријат.

Во соопштението од Либерално - демократската партија, чиј лидер е Милевски се посочува дека новиот Предлог-закон ќе ја усложни постапката пред нотар, а постои голема веројатност дека ќе зголеми и нотарските трошоци, како и времето потребно за завршување на одредени нотарски работи. 

- Со ова законско решение добивка ќе имаат мал број адвокати блиски до власта, повторно на сметка на граѓаните, а останатите адвокати ќе останат со „куси ракави“, смета Милевски.

Пратеникот, како што стои во соопштението, смета дека е потребна либерализација на нотарската работа и намалување на тарифникот на услуги. Доколку државата има недоверба кон работата на нотарите, треба да воведе засилени контроли кај оние нотари кои смета дека работат несовесно, а не целата фела да ја деградира пред јавноста, се наведува во соопштението.

Расправата за овој Закон ќе започне во вторник на собраниската Комисија за политички систем и односи меѓу заедниците.