Loading Video...
Фудбал
26. May 2022 - 14:18

Милевски: Шанса ќе добијат сите, треба да продолжиме да бидеме конкурентни во Европа

Во пресрет на новиот циклус натпревар во Лигата на нациите Благоја Милевски селекторот на нашата најдобра фудбалска репрезентација ги презентира своите очекувања на четирите натпревари кои ни престојат. 
 
На отварањето црвено-жолтите ги очекуваат две гостувања во Бугарија и Гибралтар (2 и 5 јуни), а потоа и два натпревари пред својата публика во Скопје против Грузија и со Гибралтар (9 и 12 јуни).
 
На самиот почеток Милевски не ќе може да смета на неколкумина стандардни првотимци, а шанса ќе добијат сите кои се повикани. 
 
„Поради повреда на стопалото, капитенот Стефан Ристовски нема да биде во можност да се стави на располагање за јунските натпревари. Аријан Адеми и Адис Јаховиќ се ослободени за подготовките и натпреварите поради напорната сезона и честите повреди, додека Ердал Ракип поради свои приватни причини, исто така нема да биде дел од тимот за овој собир. Тихомир Костадинов е во процес на рехабилитација од повредата на коленото. Ние сме во група со квалитетни противници. Квалитетот е израмнет, а јас не го запоставувам ниту Гибралтар, иако многумина го сматаат за аутсајдер. Нашата цел е освојување на првото место во септември кога завршува циклусот. Не чекаат шест тешки натпревари, а не само еден или четири. Императив во оваа селекција е секој да го даде најдоброто од себе. Фудбалерите да покажат дека имаат потенцијал, да го дадеме максимумот и на крајот да видиме што ќе ни донесе тоа. Ниту јас, ниту стручниот штаб не живее во минатото. Зад нас ги оставаме Италија и Португалија и ќе се обидеме најдобро што можеме да се носиме со новите предизвици. Шанса за настап и за потврда на својот потенцијал ќе добијат сите, ќе правиме ротации, а ќе бидеме задоволни ако го видиме квалитетот и потенцијалот на фудбалерите покажувајќи ни дека можеме да сметаме на нив во иднина, затоа што за нас целта останува ЕП 2024. Базата ја имаме, ја направивме во 2015/16, сега го освежуваме тимот со млади фудбалери од репрезентацијата до 21 година. Покажавме дека можеме да бидеме конкурентни во Европа, но треба да продолжиме во таа насока“, истакна селекторот Милевски на денешната средба со медиумите. 
 
На првиот собир на нашата репрезентација денеска, пристигнаа дел од фудбалерите, а ќе се комплетира во текот на наредните денови.