Најмногу снег во Ѓуриште, најстудено во Лазарополе и Маврово

Најстудено утринава е во Лазарополе и Маврово каде се измерени -7 степени, а најтопло во Гевгелија каде утринската температура е четири степени над нулата. 

Најмногу снег во изминатото деноноќие има наврнато во Ѓуриште - 14 сантиметри, а најмногу дожд наврнал во Демир Капија - 20 литри на метар квадратен.

Снег има и во Крива Паланка - 13 сантиметри, во Крушево 5, Виница, Маврово и Тополчани 4 и во Пожаране - два сантиметри.

Под нулата утринава се и температурите во Крушево -6, во Ѓуриште и Пожаране -4, Тополчани, Охрид и Берово -3, Тетово, Дебар, Претор и Крива Паланка -2, Битола и Прилеп -1 и во Виница нула степени. Над нулата утринава е во Куманово и Штип каде се измерени 1 степен, Демир Капија, Петровец Скопје, Дојран и Струмица 2 и во Скопје 3 степени. 

Времето денеска ќе биде променливо облачно и студено со умерен до засилен северен ветер. Претпладне во североисточните делови ќе има услови за повремен слаб снег, а од средината на денот облачноста и ветерот ќе се намалуваат. Температурата ќе биде во интервал од -1 до 6 степени. Во Скопје слично време со температура до пет степени.

За утре се очекува студено време кое во текот на денот ќе биде сончево и без врнежи. Кон крајот на денот се очекува облачност од запад, а нов влажен бран со пообилни врнежи од дожд ќе има од четврток. На повисоките планини над 2000 м.н.в ќе има и врнежи од снег. Најпрвин врнежите ќе се поинтензивни во западните делови, а од петок ќе бидат пообилни и во источните делови. Во четврток ќе започне да дува повремено засилен југоисточен ветер, а од петок утринските температури насекаде ќе бидат позитивни.