Почнува фестивалот „Битола отворен град 2017“

Сараевскиот рок бенд „Забрањено пушење“ и македонскиот реге состав „Conquering Lion“ ќе настапат на фестивалот „Битола отворен град 2017“, кој од денеска до 30 јуни ќе се одржува во Битола, во организација на Младинскиот културен центар-Битола.

Публиката ќе го проследи настапот на двете групи под отворено небо на Широк сокак утре со почеток во 21 часот во рамки на главниот музички хепенинг на фестивалот.

„Забрањено пушење“ премиерно доаѓаат во Битола, а бендот во моментов се подготвува за настап на најголемиот регионален фестивал, новосадскиот „Егзит“ на 8 јули.

Македонскиот реге бенд „Conquering Lion“ годинава одбележува една деценија постоење на музичката сцена, а во Битола ќе го претстават нивниот најнов студиски албум „Land of confusion“.

Дел од фестивалот „Битола отворен град 2017“ е и јавната дискусија „Како до квалитетна публика?“, која ќе се одржи вечер во 19 часот во МКЦ. На 29 јуни кај Саат кулата во Битола во 18 часот ќе се одржи работилница за модна илустрација, а во 21.30 часот пред кафе барот „Инстинкт“ ќе се одржи моден перформанс проследен со електронска музика. Програмата на овој ден е авторство на мултимедијалната артистка, модна дизајнерка и продуцентка Мелани Дигит. На 30 јуни кај Саат кулата во Битола во 22 часот ќе настапат прогресив/кор метал бендот „Spectrum“ и „Gargoyles“.

Сите настани на фестивалот „Битола отворен град 2017“ се отворени и бесплатни.