Александар Стеванов добитник на наградата за развој и афирмација на стрип-сцената

Александар Стеванов од Штип е годинашен добитник на наградата „Љупчо Филипов“ која Стрип центарот на Македонија-Велес (СЦМ) ја доделува за развој и афирмација на македонската стрип-сцена. Признанието ќе му биде врачено на Меѓународниот стрип салон во октомври во Велес.

- Стрип центарот на Македонија (СЦМ) од Велес како организатор на целокупната манифестација, ова признание го наменува за заслужни домашни дејци за развојот и афирмацијата на деветтата уметност кај нас, соопшти СЦМ.

Стеванов е предавач и промотор на стрип-настани во Македонија, пред се на петдневната стрип-работилница организирана во Американскаото катче во Штип. Во 2015 година тој е прогласен за најдобар млад сценарист на Балканот на Балканската смотра во Лесковац, Србија. 

- Се залага во областа на медиумите, го уредува поглавјето за стрип во интернет-списанието „Македонска ризница“, објавува интервјуа во домашни и странски списанија, ги изработува стриповските фонтови Ботин, Кокан, Горски топуз, со што многу ја олесна работата на македонските стрип-автори. Во последно време Стеванов успешно се занимава со дизајнирање стрип-списанија и книги, новински текстови, како и хронологија и историјат на македонската стрип-сцена, информира СЦМ. 

Признанието на Стеванов ќе му биде врачено за време на 15. Интернационален стрип салон во Велес, кој ќе се одржува од 13-ти до 15 октомври во Велес. 

Досегашни добитници на признанието „Љупчо Филипов“ се: Миле Топуз, Диме Иванов Димано, Александар Сотировски, Ване Трајков, поранешната групација „Тајфа арт“, Томислав Османли, Дарко Марковиќ, Иванка Апостолова, Киро Донев, редакцијата „Детска радост“, Оливер Ромевски, Стрип книжарницата „Бункер“, Галерија и списание „Остен“ и Томе Трајков.