Комшиќ го повика Вучиќ да ја суспендира стратегија која го „загрозува мирот на Балканот“

Усвојувањето на Стратегијата за одбрана и национална безбедност на Србија би значело нарушување на регионалниот мир и стабилност, а би претставувало и вовед во нови тензии на просторот на Западен балкан, бидејќи тоа би бил акт на отворено непријателство кон државата Босна и Херцеговина, оцени претседавачот со Претседателството на БиХ Жељко Комшиќ.

Тој оцени дека Вучиќ треба веднаш да ја суспендира Стратегијата, пред да биде доцна, потсетувајќи дека сè уште се свежи раните од последната српска агресија и спроведен геноцид, пренесува Фена.

– Ако во Србија мислат да се откажат од Дејтонскиот мировен договор, нека го кажат тоа – ќе ни биде задоволство работите во БиХ поинаку да ги уредиме, потенцира Комшиќ.

На српската Стратегија реагираше и социјал-либералната Наша странка (НС) од БиХ.

„Србија со својата Стратегија за одбрана повторно покажа територијални претензии кон БиХ. Зачувувањето на Република Српска им е национална цел, што е партикуларен и тенденциозен пристап кон БиХ, а ги подгрева и сепаратистичките намери во тој ентитет“, се веливо реакцијата од НС.

„Парадоксално е во истата таа Стратегија сепаратизмот да се наведува како една од најголемите опасности за мирот во регионот, а само после неколку реченици, истиот тој сепаратизам се поттикнува. Србија, очигледно, не сфаќа дека со ваквите чекори токму таа најмногу влијае на зговарање за укинување на ентитетот Република Српска, бидејќи начинот на кој ја брани, импонира на оние сили кои би ја припоиле кон Србија. Доколку Србија навистина им посекува добро на Србите во БиХ, нека престане да ги одвраќа од нивната држава. Србија никогаш нема да им биде она што им е БиХ, а наметнувањето на таква заблуда може сите скапо да не чини“, се наведува во соопштението на Наша странка.