Поради ограничувањето на руските медиуми, Русија го казни Google со 20.000.000.000.000.000.000.000.000.000.000.000$

Руски суд го казни Гугл со огромен износ – 20.000.000.000.000.000.000.000.000.000.000.000, или 20 децилиони долари, поради ограничување на каналите на руските државни медиуми на Јутјуб. Тоа значи дека на технолошкиот џин му е одредена казна поголема од светскиот бруто домашен производ.

И покрај тоа што е една од најбогатите компании во светот, тоа е значително повеќе од 2 билиони долари, колку што вреди Гугл на пазарот. Всушност, сумата е значително поголема и вкупниот светски БДП, кој Меѓународниот монетарен фонд го проценува на 110 билиони долари.

Казната е толку голема бидејќи, како што објави руската новинска агенција ТАСС, се удвојува со секој ден неплаќање. Портпаролот на Кремљ Дмитриј Песков призна дека „не може ни да ја изговори сумата“, но го повика Гугл „да обрати внимание“.

Компанијата не ја коментираше јавно казната ниту одговорила на барањето на Би-би-си за коментар. Рускиот медиум РБЦ известува дека казната на Гугл се однесува на ограничувањето на содржината на 17 руски медиумски канали на Јутјуб.

Иако ограничувањето почна во 2020, ескалираше по почетокот на конфликтот во Украина две години подоцна. Руските медиуми се забранети и во Европската Унија, што предизвика возвратни мерки на Русија.

Во мај 2021 рускиот медиумски регулатор Роскомнадзор го обвини Гугл за ограничување на пристапот до руските медиуми на Јутјуб.

Потоа во јули 2022 Русија го казни Гугл со 21,1 милијарди рубли (217 милиони американски долари) поради тоа што не го ограничил пристапот до содржините забранети од страна на руските власти.