Јермак: Украина и сојузниците разговараа како да извршат притисок врз Русија за 30-дневен прекин на огнот

Украина разговараше со високи американски, француски, британски и германски претставници за начините за притисок врз Русија да се согласи на 30-дневен прекин на огнот, изјави началникот на кабинетот на украинскиот претседател Володимир Зеленски, Андриј Јермак.

Јермак не прецизираше кога се одржале онлајн разговорите, во кои учествувале американските специјални пратеници Стив Виткоф и Кит Келог, францускиот висок дипломатски советник Емануел Бон, британскиот советник за национална безбедност Џонатан Пауел и високиот советник на германскиот лидер Гинтер Заутер.

Според него, учесниците нагласиле дека „целосното и безусловно прекинување на огнот мора да биде првиот чекор кон праведен и одржлив мир“.

-Разговаравме и за алатки за притисок во случај Русија да ја отфрли иницијативата или да ги прекрши договорите, рече Јермак во објава на Телеграм.

Украина изрази подготвеност да го прифати предлогот на САД за итно, привремено 30-дневно примирје, чие времетраење може да се продолжи со меѓусебен договор, и го обвинува Кремљ дека го игнорира овој план. Путин предложи прекин на огнот само за три дена – од 8 до 10 мај.

- Предлогот на Кремљ за тридневен прекин на огнот нема никаква врска со мирот, туку има за цел безбедно одржување на парадата во Москва. Ова е политичка манипулација, рече Јермак.

Русија, која започна целосна инвазија на Украина во 2022 година, се подготвува за воена парада на 9 мај по повод 80-годишнината од победата над нацистичка Германија, а претседателот Владимир Путин се надева дека тоа ќе покаже моќ.

Прекинот на огнот објавен од рускиот претседател стапи на сила денеска, а небото над главните украински градови остана мирно, и покрај извештаите за судири во источна Украина.