На швајцарските Алпи се отцепи дел од глечер и затрупа село | ВИДЕО

Огромен дел од глечер на швајцарските Алпи вчера се отцепи предизвикувајќи свлечиште од мраз, кал и карпи што го затрупа поголемиот дел од планинско село кое беше евакуирано поради ризик од одрон на карпи, соопштија локалните власти.

Едно лице во моментов се води како исчезнато, соопштија официјални лица.

Снимки од дрон емитувани од швајцарскиот национален радиодифузер СРФ покажаа огромна површина од кал и земја која целосно покрива дел од југозападното село Блатен, реката што тече низ него и пошумените делови на околната долина.

– Го изгубивме нашето село. Селото е под урнатини. Ќе го обновиме, изјави Матијас Белвалд, градоначалникот на Блатен, на прес-конференција по одронот.

Стефан Ганцер, официјален претставник во кантонот Вале, каде што се наоѓа Блатен, за швајцарските медиуми изјави дека околу 90 проценти од селото е покриено со одронот.

Швајцарската претседателка Карин Келер-Сутер изрази солидарност со локалното население додека итните служби ги предупредија луѓето дека областа е опасна и ги повикаа да се држат настрана, затворајќи го главниот пат кон долината.

– Ужасно е да го изгубиш својот дом, напиша Келер-Сутер на X.