Се очекува во Појасот Газа да влезат два камиона со вкупно 107 тони дизел

Се очекува денеска во Појасот Газа да влезат два камиона со вкупно 107 тони дизел, по месеци строго ограничен пристап до хуманитарна помош и стока до палестинската енклава, објави египетската телевизиска станица Ал-Кахера њуз.

Министерството за здравство на Газа предупреди дека недостатокот на гориво сериозно ја попречува работата на болниците и дека лекарите се принудени да дадат приоритет на некои видови медицинска нега пред други поради недостаток на ресурси. Немаше непосредна потврда дали камионите веќе ја преминале границата.

Здравствените власти во Газа соопштија дека десетици луѓе починале од неухранетост во последните недели. Вчера беа пријавени седум смртни случаи поврзани со неухранетост.

Израел го обвинува палестинското исламистичко движење Хамас за хуманитарната криза во Газа и вели дека работи на подобрување на пристапот до помош со привремено запирање на непријателствата во одредени области, обезбедување воздушен транспорт и поставување заштитени патишта за конвои со помош.

Според агенциите на ОН, воздушниот транспорт не е доволен и Израел мора веднаш да дозволи значително поголеми количини помош по копно.

Израелската војска, која координира хуманитарна помош, соопшти дека 35 камиони влегле во Газа од јуни, речиси сите минатиот месец.

Повеќе од 700 камиони со гориво ја преминаа границата во јануари и февруари за време на привременото примирје пред Израел да ја продолжи својата целосна воена офанзива во март.

МИА