Романот „Седумцрквие“ од чешкиот писател Милош Урбан објавен на македонски

Издавачката куќа „Антолог“ го објави  романот „Седумцрквие“, готски трилер посветен на Прага, од чешкиот писател Милош Урбан. Преводот на македонски е на Драган Георгиевски.

- „Седумцрквие“ е мрачен трилер за Кветослав Швах и за тоа како тој е поврзан со убиствата во седум катедрали во Прага. Со оваа книга, преведена на десет јазици, Урбан се прославил како „црниот витез на чешката литература“, а самата книга од критиката била прогласена за „ремек-дело на модерната готика“, информира „Антолог“.

Милош Урбан (1967) е еден од најзначајните и најчитани чешки прозаисти. Дел од детството го поминал во чехословачката амбасада во Лондон. Откако дипломирал на катедрата за англистика и нордистика во Прага, една година стажирал на Универзитетот во Оксфорд. Од 1992 работи како уредник во неколку издавачки куќи. Во последно време се посветува на драматиката и на сценаристиката.