МЗШВ: Засилени контроли на АХВ во Липково поради појава на сипаници кај овците и козите

Министерот за земјоделство, шумарство и водостопанство, Цветан Трипуновски, и директорот на Агенцијата за храна и ветеринарство, Оливер Миланов, денеска остварија средба со одгледувачите на овци, на која се разговараше за актуелната епидемиолошка состојба со болеста сипаници кај овците и козите во Липково, Кумановско.

Со цел да се спречат нови жаришта на територијата на државата, на состанокот, како што се наведува во соопштението од МЗШВ, е нагласено дека е неопходно одгледувачите строго да се придржуваат кон пропишаните контролни и заштитни мерки донесени од Агенцијата. Движењето на животните треба да се врши исклучиво со издаден ветеринарно-здравствен сертификат од надлежното ветеринарно друштво.

Доколку сточарите забележат симптоми или нагли промени кај животните, вклучително и зголемена смртност, тие треба веднаш да ги известат ветеринарните друштва и Агенцијата за храна и ветеринарство.

- Надлежните институции спроведуваат контролни и заштитни мерки во заштитната зона во радиус од три километри и во зоната под надзор во радиус од 10 километри околу одгледувачниците во кои е потврдена болеста, со цел навремено информирање на сточарите за појавата и ширењето на болеста - информираат од Министерството.

Дополнително, на средбата е истакнато дека извозот на јагнешко месо, производи од јагнешко месо и производи од млеко добиено од овчо млеко, кои биле подложни на пастеризација, не е доведен во прашање, движењето на животните од одгледувачниците кон кланичните капацитети не е забрането, а во сила остануваат рестрикциите за движење животни и за работа на добиточните пазари.

Од МЗШВ посочуваат дека во зависност од развојот на епидемиолошката состојба на терен, се очекува кон средината на идниот месец да бидат донесени нови заштитни и контролни мерки за справување со болеста. 

МИА