Трамп: Иран контактираше со нас, очајнички сакаат да постигнат договор

Американскиот претседател, Доналд Трамп, изјави дека иранското раководство го контактирало и изразило желба за постигнување договор, откако Соединетите Американски Држави извршија нови напади врз ирански цели.

„Се јавија пред извесно време. Толку очајнички сакаат да постигнат договор“, изјави Трамп пред новинарите во авионот „Ер форс еден“ при враќањето во САД од самитот на НАТО во Анкара.

Неговите изјави следуваат откако американската армија соопшти дека погодила повеќе од 90 ирански воени цели. Трамп за нападите рече дека биле „одмазда“.

Американскиот претседател на враќање од Турција накусо се задржа во Велика Британија, каде што го промени авионот во базата на Кралските воздухопловни сили Милденхол во Сафолк, продолжувајќи го патувањето со новиот авион „Ер форс еден“, што му беше подарен од Катар.

Трамп претходно ги отфрли тврдењата дека одлуката да користи постар авион при заминувањето од Турција била поврзана со безбедносни закани.

На прашањето дали е запознаен со веродостојни закани кон неговиот авион, американскиот претседател рече дека постојано се соочува со закани.

„Постојано ми се закануваат. Јас сум број еден на нивната листа“, изјави Трамп.