Новиот изглед на Трамп предизвика реакции на социјалните мрежи

Препознатливата фризура на Доналд Трамп со децении буди љубопитност, уште од времето кога сегашниот американски претседател беше познат како бизнисмен и телевизиска личност. Овојпат, повод за коментари стана нејзината очигледно потемна нијанса.

Трамп во петокот беше фотографиран по излегувањето од претседателскиот авион „Ер форс уан“ во Мористаун, Њу Џерси. Наместо неговата вообичаена руса боја, на новите фотографии таа изгледа значително потемна.

Промената не остана незабележана на социјалните мрежи. Новинари, политички коментатори и бројни корисници реагираа на фотографиите.

И минатиот месец изгледот на Трамп беше тема на интернет, откако при негово појавување во Лас Вегас беше забележано дека неговата препознатлива фризура изгледа посветла и погуста од претходно.

Со години постојат и шпекулации дека Трамп носи перика, што тој неодамна самиот го спомена за време на говор во Белата куќа.

„Со години морав да трпам луѓе кои велеа: ‘Тој носи перика’. Не носам перика“, рече Трамп.