Могерини: Опстанокот на ЕУ никогаш не бил понеизвесен

Високата претставничка на ЕУ за надворешна политика и безбедност, Федерика Могерини смета дека новата надворешнополитичка и безбедносна стратегија на Унијата треба да продолжи со комбинирање на „меки и цврсти“ моќи на ЕУ, преку јакнење на меѓусебната солидарност на членките и продолжување на соработката со НАТО.

Таа нагласи дека „ЕУ мора да се поврзе и со новите актери во светот, бидејќи ниту една членка не може сама да одговори адекватно на нестабилност и новите безбедносни закани“.

- Во денешно време, полно со предизвици, ЕУ треба да размислува стратешки, да има заедничка визија и да настапува единствено. Остварувањето на целите поради кои е формирана ЕУ, па и самиот нејзин опстанок, никогаш не биле понеизвесни, а на нашите граѓани им е потребна најсилна ЕУ, истакна Могерини во врска со стратешкиот документ кој неодамна им го предложи на европските институции и земјите членки на Унијата.

Шефицата на европската дипломатија додаде дека „во ситуација на безбедносни предизвици во ЕУ и нејзиното опкружување, како и Брегзит, Европејците треба повторно да размислат како функционира нивната интеграција“.