Париз и Берлин повикаа на европска солидарност во бегалската криза

Министрите за внатрешни работи на Франција и Германија, Бернар Казнев и Томас де Мезиер денеска од Париз ги повикаа земјите членки на ЕУ да покажат солидарност со државите кои се на удар на приливот на бегалци, пред се Грција и Италија.

Апелот на двајцата министри доаѓа во време на се поголеми несогласувања меѓу членките на Унијата околу проблемот со бегалците.

- Наша заедничка позиција е дека е неопходно да продолжи поддршката од ЕУ за државите преку кои бегалците влегуваат во Европа - Грција и Италија, со создавање на центри за прием на мигранти и за зајакнување на контролата на надворешните граници на Унијата, изјави Казнев по средбата со Мезиер.

Казнев нагласи дека поддршката за Грција и Италија треба да се изрази и преку спроведување на планот за прераспределување на мигрантите меѓу земјите членки на ЕУ.

Лани во септември Европската комисија објави план за прераспределба на мигрантите од Грција и Италија во другите земји на ЕУ според утврдени квоти, кој го поддржаа Франција и Германија, но на него се спротивставуваат некои од членките на Унијата, пред се оние од Централна Европа. 

На Самитот на ЕУ во Братсилава во петокот, Полска, Словачка, Унгарија и Чешка повторија дека одбиваат да прифаќаат бегалци според квотите на Еврокомисијата. Грција и Италија од друга страна апелираат на поголема солидарност во справувањето со мигрантската криза.

Казнев и Мезиер денеска најавија и дека на средбата на министрите за внатрешни работи на земјите членки на ЕУ кон средината на октомври, Франција и Германија ќе побараат Европската комисија да предложи законска иницијатива за зајакнување на борбата против радикалните исламисти и ќе предложат одржување вежби на новата европска гранична служба до крајот на годинава, со што таа би станала оперативна што е можно побрзо.