Општините Новаци и Коломбел промовираат меморијален туризам

Општина Новаци и француската општина Коломбел ќе промовираат развој на меморијален туризам.

Иницијативата доаѓа по завршувањето на заедничко истражување, означување, уредување и документирање на позначајни места, локации и споменици од првата светска војна на територијата на општината, истакна градоначалникот Лазар Котевски по завршувањето на официјалната посета на француската делегација во општина Новаци.

-Теренското истражување и уредување на поважни историски места што датираат од Првата светска војна, рововите на кота-1050 и други објекти сега се достапни за туристите. Валоризацијата на резултатите од досегашните истражувања на културните наследства на Новаци придонесуваат за развој на алтернативниот и меморијалниот туризам во општината и затоа ја поддржуваме оваа активност, посочи Котевски.

Општина Коломбел и општина Новаци работаат на тема „Мир и помирување факти од Прва светска војна“ и затоа во Коломбел ќе изградиме споменик кој што ќе се однесува на мирот и помирувањето од Првата светска војна, најави Енриет Од, член на општинскиот совет на Колобел.

- Освен расчистувањето на рововите, болниците, некогашниот аеродром и другата инфраструктура од бурните настани на периодот од 1916 до 1918 година, со овој проект изработивме веб-страна, билборди, карта, двојазични публикации, а на мапираните терени – ознаки и патокази на линијата од фронтот, потврди гостинаката од Франција, Од.

Во текот на следниот месец, на 11 ноември, градоначалникот на општина Новаци Лазар Котевски ќе оствари возвратна посета на Колобел каде ќе биде потпишан Меморандум за сорабока.