Околу 850 дела се поднесени пред Европскиот суд за човекови права во Стразбур по пучот во Турција

Приближно 850 дела се поднесени во Европскиот суд за човекови права во Стразбур по неуспешниот пуч во Турција, а најголемиот број се однесуваат на отпуштањето на државните службеници, изјави висок европски претставник.

Даниел Холтген, портпарол на генералниот секретар на Советот на Европа Турбјорн Јагланд, истакна дека понеуспешниот обид за воен удар во Турција во јули, околу 40.000 случаи се пред турскиот Уставен суд.

Холтген наведе дека целта на генералниот секретар Јагланд, кој е во посета на Турција, е да се изнајде начин за справување со таквата ситуација.

Јагланд веќе разговараше со претседателот на турскиот Уставен суд и со министрите, а за денеска е предвидена и средба со претседателот Реџеп Таип Ердоган.

- Неговата мисија е да најде излез од сегашната деликатна етапа меѓу Турција и Европа, посочи Холтген алудирајќи на постоечките тензии меѓу Анкара и Брисел.