Цивили масовно го напуштаат источниот дел на Алепо

Сиријци масовно со автобуси го напуштаат источниот дел на Алепо, каде се водат жестоки борби, и се упатуваат кон реони во градот, кои се под контрола на владините сили, изјави портпарол на ОН во Женева.

- ОН се длабоко загрижени за состојбата, безбедноста и заштитата на цивилите во Алепо, посебно на оние кои се блокирани во источниот дел од градот кој е под опсада, бидејќи таму судирите се најжестоки и се зајакнати во последните 24 часа, истакна портпаролот на светската организација.

Само во последните 24 часа околу 800 лица пристигнале во една напуштена фабрика за памук во западниот кварт Џибрин, а други 1.260 цивили пристигнале во квартот Ханано, кој неодамна беше заземен од силите на сирискиот режим. Тие се засолнуваат кај свои роднини или заминуваат на безбедни места надвор од Алепо.

Вкупно 31.500 луѓе успеале да побегнат од источниот дел на Алепо во последните седум денови.