Муцунски се обрати на Конференција за слобода на медиумите во Западен Балкан

Слободата на изразување претставува основен столб за развојот на демократијата,  а  клучната улога во тоа ја имаат слободните медиуми, истакна македонскиот заменик министер за информатичко општество и администрација Тимчо Муцунски, во обраќањето на конференцијата „Слободата на медиумите во Западен Балкан“, што се одржа во Виена. 

Муцунски говореше на воведната сесија на конференцијата, чиј организатор е австриското претседателство со ОБСЕ, во соработка со Канцеларијата на ОБСЕ за слобода на медиумите. На воведната сесија  се обратија и  претседавачот со ОБСЕ за 2017 година и  министер за надворешни работи на Република Австрија, Себастијан Курц и Дуња Мијатовиќ, претставник на ОБСЕ  за слобода на медиумите.

Како што соопшти МИОА, Муцунски се осврнал на важноста на квалитетното и професионално новинарство, кое, како што потенцираше, треба целосно да се поддржи, заштити и негува. Посочил дека обезбедувањето слобода на изразување, слободни и плурални медиуми, бара континуирано следење на состојбите и соодветно преземање мерки и активности од страна на различни субјекти и во различни области.

- Усогласувањето со меѓународните стандарди е важно прашање во процесот на регулација на медиумската сфера. Но, круцијално е и создавањето на саморегулација која се базира на принципите на транспарентност и отчетност, а истовремено промовира и етичко известување, истакнал Муцунски, соопшти МИОА.

Обраќања на воведната сесија имаа и  претседавачот со ОБСЕ за 2017 година и  министер за надворешни работи на Република Австрија, Себастијан Курц, како и Дуња Мијатовиќ, претставник на ОБСЕ  за слобода на  медиумите.

Целта на конференцијата е да обезбеди платформа за размена на иницијативи и најдобри практики во однос на важните прашања поврзани со слободата на медиумите кај земјите од регионот, со посебен акцент на безбедноста на новинарите и  медиумската етика. Учествуваа претставници на ОБСЕ,регионални експерти, претставници на граѓански организации, министри и други високи владини претставници од регионот, кои дискутираа за прашања поврзани со задржувањето на професионалните стандарди и довербата во медиумите кои треба да останат независни и непристрасни.