Општина Пробиштип објави оглас за продажба на осум градежни парцели

Општина Пробиштип објави јавен оглас за продажба на осум градежни парцели, информираше денеска градоначалникот Тони Тоневски. На продажба се понудени градежни парцели за изградба на куќи, станови и стопански објекти од лесната и незагадувачка индустрија. Парцелите се со големина од 350 до 850 м/2 и се наоѓаат во атрактивните зони на градот.

- Цената согласно законот се движи зависно од намената од 61 денар до 1.100 денари од м/2. Се надеваме дека ќе има голем интерес од жителите на Пробиштип, можеби и од околните градови, бидејќи навистина се работи за доста атрактивни локации, вели Тоневски.

Тој истакна дека парцелите за стопански објекти за лесна и незагадувачка индустрија се наоѓаат во Индустриската зона блок 75, кај старата бензинска пумпа.

- За станбено и индивидуално домување се наоѓаат меѓу улиците „11 Октомври“ и улицата „Никола Карев“. Исто така има и парцели кај станбените згради наречени „Неготинки“. Овие парцели се доста интересни, бидејќи претходно имаше заинтересирани токму за овие парцели, рече Тоневски.

Граѓаните за осумте градежни парцели во Пробиштип можат да аплицираат, а јавната електронска аукција ќе се одржи на 30 март. Општина Пробиштип за оваа година има планирано да инкасира околу 30 милиони денари од продажба на градежно неизградено земјиште.