Почнува Блуз и соул фестивал 2015

Блуз и соул фестивал 2015 почнува вечер во Сити Хол центарот во организација на Дирекцијата за култура и уметност-Скопје. Фестивалот ќе го отвори македонскиот гитарист Дамир Пух со неговиот блуз проект.

Според селекторот на Фестивалот, Васја Ивановски, Дамир Пух е извонреден музичар, кој ќе направи одлична кариера и неговиот настап не смее да се пропушти. Истата вечер на Фестивалот ќе настапи и Гркот Сакис Доволис трип.

Утревечер во рамки на втората фестивалска вечер ќе настапи блуз вокалистката Лајла Зое Бенд од Канада, која, како што посочи Ивановски, ја споредуваат со Џенис Џоплин.

- Последнава година таа ја освојува европската музичка сцена. Се вбројува во најдобрите вокали на светската музичка сцена. Нејзините предци потекнуваат од овие простори, рече Ивановски.

Додаде дека на Блуз и соул фестивалот, кој идната година ќе одбележи 20-годишен јубилеј, и има значителна улога и надвор од границите на Република Македонија, настапиле многу познати музичари.

Билетите за Фестивалот се продаваат во Југотон и „Купи карти за се“.