Нови инвестициски активности на ЈП „Пазари“-Битола

Јавното претпријатие „Пазари“ Битола најави нови инвестициски активности  со цел зголемување  на ефикасноста на услугите.

Според Сашо Стаматов, директор на ЈП „Пазари“, во битолскиот централен градски пазар ќе биде изграден посебен дел за продажба на рачно изработени производи и бижутерија.

- Во напредна фаза е изградбата на шест нови павиљони и партерно уредување на површина од 1.000 метри квадратни што се во главното јадро на пазарот, а паралелно подготвуваме нов проект за реонот број 2 кој е непосредно до управната зграда, познат како реон за продажба на бижутерија и други рачно изработени производи. Со овој инвестициски зафат ќе се комплетира новата слика на централниот градски пазар, истакна Стаматов.

ЈП „Пазари“-Битола минатата година изврши реконструкција на реонот 4 со која беше опфатена површина од 850 квадратни метри, а беше изграден нов современ павиљон за продажба на зеленчук и овошје, за што беа вложени 12 милиони денари.