Околу 25.000 мажи во Германија жртви на семејно насилство

Во 2015 година во Германија се регистрирани над 125.000 луѓе кои биле жртви на насилство предизвикано од нивните партнери во брачни или вонбрачни врски.

Од нив, над 100 илјади се жени, а остантите 25.000 мажи, јави дописникот на МИА од Берлин.

Според извештајот на Федералната криминалистичка полиција (БКА), која заедно со Сојузното министерство за семејни прашања, ја истражувала оваа појава насилството вклучувало физички напади, убиства, силувања, сексуални напади, закани и вознемирување.

Од женските жртви, 331 биле убиени од нивните партнери, 11.400 биле тешко повредени, над 65.000 минале со помали повреди, околу 16.000 биле предмет на закана, а околу 8.000 жени пријавиле вознемирување.

Кај силувањето и сексуални напади речиси сите случаи се жени како што е случајот и со над 90 насто од случаите на вознемирување.

Германските власти апелираат сите жртви на насилство да се јавуваат на линиите за помош кои што работат 24 часа на ден и нудат советодавни и други услуги на повеќе јазици.