Османи во посета на Словенија

Заменик претседателот на Владата задолжен за европски прашања, Бујар Османи, денеска ќе престојува во работна посета во Република Словенија.

Како што информираат од Секретаријатот за европски прашања, Османи ќе има средба со заменик претседателот на Владата на Словенија и министер за надворешни работи, Миро Церар, на која ќе бидат отворени темите поврзани со евроатлантските интеграции на земјата, во насока на отпочнувањето на пристапните преговори со ЕУ, динамиката на спроведување на реформите предвидени во Планот 18, како и очекувањата од претстојните јунски самити.

Османи ќе се сретне и со државниот секретар во Министерството за надворешни работи на Република Словенија, Добран Божич, како и со програмскиот директор на Центарот за европски перспективи, Андреја Долничар Јерај и заменик директорот на Центарот за меѓународна соработка и развој, Ема Роде, со кои ќе разговара за предизвиците што и претстојат на Северна Македонија во наредниот период, а ќе ги отворат и темите во однос на проширувањето на ЕУ на земјите од Западен Балкан со што се зајакнува стабилноста и безбедноста во Унијата, како и справувањето со мигрантската криза, напливот на фундаментализмот, како и борбата за справување со ширењето на лажните вести.

По посетата на Словенија, Османи патува во Мадрид, каде што ќе се сретне со претставникот на земјата во Европската Унија и државен секретар за Европски прашања во Министерството за надворешни работи на Кралството Шпанија, Луис Марко Агуириано Налда, се наведува во соопштението од СЕП.