Почна евакуацијата на илјадници луѓе од неколку сириски локации по спогодбата меѓу Владата и бунтовниците

Во Сирија почна масовно преселување на шиитско население од две сириски насели места во замена за евакуација на сунитските бунтовници и цивили од други две населени места, согласно спогодбата склучена меѓу Владата на Башар ал Асад и бунтовниците.

Сирискиот центар за монтиринг на човековите права, со седиште во Лондон соопшти дека изутринава автобуси, кои превезуваат цивили го напуштиле шиитските села Ал Фуа и Кефраја во северозападната провинција Идлиб, кои подолг временски период се под опсада од бунтовниците. 

Автобуси, кои превезуваат сунитски бунтовници и нивните семејства се повлекле истовремено од населеното место Мадаја во близина на Дамаск, кое е опколено од силите на сириската Влада и нивните сојузници.

Центарот прецизира дека предвидената евакуација од Забадани, исто така опколено од владините сили, е одложена и се очекува да почне вечерва или утре.

Владата на Асад постигна неколку спогодби со опозицијата изминатата година, овозможувајќи им на бунтовниците и нивните семејства да ги напуштат регионите, кои се под опсада на владините сили. 

Опозицијата смета дека со тие спогодби всушност се вршат насилни иселувања и намерни демографски промени.