Рубио: Нападите на Вашингтон врз Иран се проактивна мерка за заштита на САД

Американскиот државен секретар Марко Рубио изјави дека нападите на Вашингтон врз Иран се проактивна мерка за сопствена заштита на САД пред „неминовна закана“.

– Апсолутно постоеше неминовна закана, а неминовната закана беше тоа што знаевме дека ако Иран биде нападнат, а верувавме дека ќе биде нападнат, тие веднаш ќе тргнат по нас – рече Рубио пред новинарите во Вашингтон.

САД не сакаа да стојат со скрстени раце и да примат удар пред самите да возвратат, додаде тој.

– Знаевме дека ќе има израелска акција. Знаевме дека тоа ќе предизвика напад врз американските сили и знаевме дека ако не тргнеме превентивно по нив пред тие да ги почнат тие напади, ќе претрпиме поголеми жртви-, рече Рубио, додавајќи: „Ова мораше да се случи, без разлика на сè“, пренесе ДПА.

МИА