Штипски „Стипион“ должен околу 4,5 милиони денари

ЈП „Стипион“-Штип надлежно за наплатата на паркинг местата, одржување на улиците и за уличното осветлување има долг од 4.500.000 денари кон фирми добавувачи, електирчна енергија и телефони.

Директорот на ЈП „Стипион“-Штип, Сашко Протогеров вели дека формирана е комисија која ќе утврдува како настанал долгот, но и кој ќе биде конечниот долг, а побарувањата им изнесуваат над еден милион денари. Тој истакна дека во тек се и преговори со фирмата која е надлежна за системот за наплата на паркинг местата по пат на СМС, а во текот на овој месец очекува и позитивно решение на проблемите.

-Имаме допис и од Народниот правобранител оти сме ги ставиле граѓаните во нерамноправна положба, оние кои немаат мобилни телефони. Значи  потребно е и грепки да воведеме за наплатата на паркинг местата. Имаме недостаток на контролори, така да мислиме и таа група да ја зголемиме, а со цел поефективна да биде наплатата, вели Протогеров.

Тој истакна дека како  претпријатие вршат одржување и промена на уличното осветлување. Но, претходното раководство не потпишало договор со претходниот градоначалник за овие услуги да се наплаќаат.

-Уличното осветлување ни е дадено со одлука на Советот на Општина Штип. Но, ние немаме, а и претходното раководство на фирмата не направило никаков договор со локалната самоуправа. Така да сме во фаза на изготвување на ценовник, кој ќе треба да помине на Управен одбор и на Советот, рече Протогеров.

Тој истакна дека ЈП „Стипион“ за тековната зимска сезона има обезбедено доволно колични сол и ризла за чистење на улиците од снежните навеви.