Шулц задутре ќе го посети Лезбос

Претседателот на Европскиот парламент Мартин Шулц во петок ќе го посети грчкиот остров Лезбос каде на лице место ќе ја увиди кризата со бегалците и начинот на кој грчките власти се справуваат со ситуацијата.

Шулц ќе биде придружуван од еврокомесарот за миграции, Димитрис Аврамопулос и министерот за надворешни работи на Луксембург Жан Аселборн.

Во меѓувреме, грчката крајбрежната стража уапси шверцер на мигранти од Турција, кој во текот на изминатиот викенд превезол над 1.000 бегалци и мигранти на островот Лезбос.

Осомничениот бил толку самоуверен, што му дозволил на еден аматерски фотограф да го слика неговиот брод со кој во тој момент на островот дошле околу 150 лица, меѓу кои и жени и деца, соопштија локалните власти. Шверцерот на секој мигрант му наплатил по 1.500 евра за патувањето.

Грчка патрола на крајбрежна стража и припадници на Фронтекс го уапсиле во понеделникот, откако забележале дека неговиот брод неколку пати плови меѓу турскиот брег и Лезбос.