Синдикатот и Владата договорија повисоки плати за здравствените работници

Февруарската плата за лекарите специјалисти во државата ќе биде поголема за 10 до 12.000 денари. Двата здравствени синдикати се испазарија со Владата и Министерството за здравство за зголемување на платите на медицинарите.

Освен 25-процентното зголемување на специјалистичкиот кадар, 15 проценти ќе биде поголем и личниот доход на специјализантите и општите лекари во државните болници, 10 проценти за медицинските сестри и лаборанти и 5 за здравствени соработници. За министерот Филипче ова било историско зголемување на платите во здравството.

-Постигнавме историски договор за ова рекордно зголемувањ ена платите во здравството. Ако земеме и од 2018 зголемувањата, лекарите специјалисти имаат околу 40 проценти зголемување а медицинските сестри 35, вели Венко Филипче министер за здравство

-Ова се однесува за околу 15 000 лица во здравството, ова е успех за нас, вели Љубиша Каранфиловски, претседател на Самостоен синдикат за здравство и фармација.

Со зголемувањето на платите во здравството, од Синдикатот на Клинички сега ретерираат од нивната изјава дадена пред три недели дека ќе го повикаат членството да ја поддржи владејачката партија  на претстојните избори. Денеска велат дека погрешно биле интерпретирани во јавноста.

-Погрешно беше интерпретирана нашата изјава, ние не може да влијаеме на никој како да гласа, тоа е самостојно, вели Горан Беговиќ, претседател на Синдикат на Клинички.

Од договорот на синдикатите засега извисија техничкиот персонал и административците, но надлежните најавија дека тоа ќе го решаваат во следниот период.