Суспендирањето на Шенгенот ја загрозува ЕУ, смета шведскиот премиер

Укинувањето на слободното движење во рамките на Шенген зоната ја загрозува Европската унија, изјави премиерот на Шведска Стефан Ловен во интервју за телевизија „Еуроњуз", пренесува ТАСС.

- Ако се распадне договорот, ќе се доведат под прашање и ЕУ и се за што сме работеле многу години, рече тој.

Министрите за внатрешни работи на земјите членки на ЕУ утре  на неформален состанок во Амстердам  ќе разговараат за можноста за продолжување на граничната контрола во Шенген зоната. Во моментов Норвешка, Шведска, Данска, Австрија, Германија, Франција и Малта се поригорозни во контролата на своите граници.

Според шведскиот премиер нестабилноста на пазарот на трудот и зголемувањето на социјалните тензии довеле до драстичен раст на национализмот во Шведска.

- Станува збор за страв од утрешнината, што го доживува населението. При нестабилен пазар на трудот луѓето си го поставуваат прашањето: Ќе има ли утре за мене работа и ако не, што ќе се случи со мене?, објасни премиерот.

Радикалната партија „Шведски демократи", која се залага за прекин на миграцијата во кралството, ужива поддршка од 25 проценти од Швеѓаните, покажуваат анкетите.