Трамп: Заслужувам Нобелова награда за мир, но се сомневам дека ќе ја добијам

Американскиот претседател Доналд Трамп, кој ја покрена воената интервенција против Иран и сè уште нема постигнато мир во Украина, денеска изјави дека треба да ја добие Нобеловата награда за мир, но призна дека се сомнева во своите шанси.

„Не знам каква ќе биде нивната одлука“, рече Трамп, говорејќи за наградата за 2026 година што Норвешкиот Нобелов комитет треба да ја објави утре.

„Познати се по тоа што можеби не им ја доделуваат на луѓе како мене“, додаде тој.

Откако минатата година се врати во Белата куќа, Трамп во повеќе наврати истакнуваше дека ја заслужува наградата, која важи за најпрестижната во светот.

„Време е за тоа. Но, за мене беше голема чест што последен пат ја добив посредно, од добитничка која рече дека никој во историјата не ја заслужува повеќе од претседателот Трамп“, рече тој пред новинарите во Овалната соба.

Венецуелската опозициска лидерка, Марија Корина Мачадо, во јануари му го врачи на Трамп нејзиниот медал од Нобеловата награда за мир за 2025 година, барајќи поддршка од САД за нејзините активности во Венецуела.

Трамп смета дека треба да ја добие наградата затоа што активно се вклучил во осум конфликти откако ја презеде функцијата во јануари минатата година.

Лидерите на Камбоџа, Израел и Пакистан изјавија дека го номинирале Трамп, иако тоа не е потврдено.

МИА