Во Брисел состанок на министрите за надворешни работи на ЕУ

Министрите за надворешни работи на Европската унија денеска ќе се сретнат во Брисел, а на агендата на нивниот состанок се додадени најновите случувања во Сирија и Грузија, заедно со војните во Украина и на Блискиот Исток, како и политичката ситуација во Белорусија, јави ДПА.

Министрите треба да ја усвојат 15-тата рунда нови санкции против Русија.

Украинскиот министер за надворешни работи Андриј Сибига се очекува да им се придружи преку видео-конференција за да обезбеди ажурирање за ситуацијата на бојното поле.

На списокот се и можните санкции против грузиската влада, откако на проевропските демонстрации беше одговорено со полициско насилство и масовни апсења. Ќе се разговара и за резултатите од претседателските избори во таа кавкаска земја.

На состанокот, со кој првпат претседава новиот висок претставник за надворешна политика и безбедност Каја Калас, ќе се разговара за ситуацијата во Сирија. Министрите ќе се осврнат и на ситуацијата во соседните земји на Сирија, во време кога Израел и Либан го почитуваат кревкиот прекин на огнот, а Израел продолжува да ја напаѓа Газа.