Во Ирак уапсени неколку лица поради пожарот на свадба

Ирак денеска прогласи период на национална жалост за жртвите од пожарот на свадбена веселба, во кој загинаа најмалку 114 лица, пренесе ДПА.

Околу 200 луѓе се повредени во пожарот што избувна синоќа во градот Ал Хамданија во северната ирачка провинција Ниневија, изјави гувернерот Наџим ал Џабури.

Ирачкиот премиер Мохамед ал-Судани нареди тридневна жалост ширум земјата за жртвите во пожарот, соопшти неговата канцеларија за односи со медиуми.

Ал-Џабури денеска прогласи еднонеделна жалост во Ниневија и нареди прославите по повод роденденот на исламскиот пророк Мухамед да се одложат „до натамошно известување“, јави ирачката државна новинска агенција ИНА.

Ирачкото Министерство за внатрешни работи, кое е задолжено за домашната безбедност, соопшти дека се уапсени девет работници во салата, а по четворица сопственици се издадени налози за апсење.

– Експертите за криминалистички докази и цивилната одбрана потврдија дека салата е изградена од многу запалив материјал Ecobond. Имаше и огномет што го предизвика инцидентот со пожарот, покрај недостигот на безбедносни услови, рече портпаролот на министерството Саад Маан.

Министерот за внатрешни работи Абдул Амир ал-Шамари денеска нареди да се формира комитет за да го истражи инцидентот за кој Министерството рече дека според прелиминарниот извештај „не е криминален“, туку поради отсуство на безбедносни мерки.

Во моментот на пожарот во салата имало околу 1.000 луѓе, според заменик-гувернерот на Ниневија, Хасан ал-Алаф.

Пожарот предизвика уривање на салата по што спасувачките екипи бараа преживеани под урнатините.