Во Кичево се одржа манифестација „Отворен ден на мултикултурализмот“

Културна манифестација „Отворен ден на мултикултурализмот“ се одржа денеска на платото пред и во зградата на Центарот за култура „Кочо Рацин“ во Кичево.

Манифестацијата е на иницијатива на членовите на групата „Вреди да си од Кичево“, се одржува по втор пат, а организаторите сакаат таа да биде традиционална. 

Настанот го отвори градоначалникот на општина Кичево, Фатмир Дехари, кој истакна дека со манифестацијата се негува различноста и почитувањето на сите етникуми кои живеат во таа општина.

По отварањето на манифестацијата се одржа дефиле со народни носии од сите етникуми, а потоа беше отворена изложба на фотографи од Кичево и Кичевско. Присутните имаа можност да ја вкусат богатата кичевска кујна, каде што се преставија традиционални јадења од сите националности.