Вонредна состојба поради невремето во 10 српски општини

Раководителот на секторот за вонредни ситуации, Лука Чаушиќ, денеска на седницата на Републичкиот штаб за вонредни ситуации во Србија, изјави дека во десет локални самоуправи е прогласена вонредна состојба главно поради проблеми во снабдувањето со електрична енергија предизвикано од интензивните снежни врнежи. Тој нагласи дека е важно што немало човечки жртви како резултат на временските непогоди.

Чаушиќ додаде дека во Пријепоље е прогласена вонредна состојба поради ситуацијата на реката Лим.

Вонредна состојба е прогласена во локалните самоуправи: Лучани, Лозница, Ваљево, Осечина, Мали Зворник, Крупањ, Пријепоље, Мајданпек, Сјеница и Ивањица.

– Министерството за внатрешни работи – Сектор за вонредни ситуации континуирано ја следи ситуацијата на терен и нема да го намали нивото на подготвеност на своите сили и ќе биде присутно во сите области каде што е потребно – истакна Чаушиќ.

Тој посочи дека во последните денови се евакуирани и спасени 38 лица во Ужице, Панчево, Пожега, Љубовија, Лозница, Бор, Врање, Нови Пазар, Сврљиг, Дољевац.

Исто така, тој рече дека во периодот од 4 до 12 јануари се евидентирани 102 интервенции поради последиците од снежните врнежи. Како што наведе, ангажирани се 226 пожарникари-спасувачи со 104 возила, 23 пумпи и три чамци.