Зеленски го потпиша буџетот за 2025 со 60 проценти од трошоците за одбрана и безбедност

Украинскиот претседател Володимир Зеленски денеска го потпиша Законот за државниот буџет за 2025 година, од кој 60 отсто ќе биде за одбрана од руската инвазија и за безбедност – нешто повеќе од 50 милијарди евра, додека аналогниот дел од буџетот на Русија е три пати поголем од тоа.

– Приоритет на буџетот е заштитата на нашата земја, тој вклучува финансирање на безбедносните и одбранбените сили, набавка и производство на оружје, беспилотни летала и опрема, напиша украинскиот премиер Денис Шмигал на Телеграм.

Буџетот од вкупно 82 милијарди евра беше одобрен од украинските пратеници на 19 ноември.

Украина, која има помалку оружје, помалку регрути и помалку пари од Русија, е принудена да ги зголеми трошоците за одбрана бидејќи војната влегува во третата година.

Руската инвазија на Украина која почна во февруари 2022 година ја опустоши нејзината економија, уништи добар дел од нејзината инфраструктура, но Западот и помага.

Заминувањето на милиони Украинци во странство исто така ги намали приходите од даноците во државната каса.