Зеленски: Се обидуваат да не уништат и да не избришат од лицето на земјата

Украинскиот претседател Володимир Зеленски утрово реагираше на веста за експлозиите низ земјата, велејќи дека Русите „се обидуваат да ја уништат“ Украина.

– Ги уништуваат нашите луѓе кои спијат дома во Запорожје. Убиваат луѓе кои одат на работа во Дњепар и Киев. Воздушната тревога не стивнува низ цела Украина. Тие се обидуваат да не уништат и да не избришат од лицето на Земјата, рече Зеленски.

Антон Герашченко, советник на министерот за внатрешни работи на Украина, на Твитер објави фотографии од нешто што изгледа како игралиште со натпис: „Детско игралиште во центарот на Киев по нападот“.

Според него, од нападите на Киев досега е потврдена смртта на пет лица, а повредени се 12.

Михаило Подољак, советник на претседателот Володимир Зеленски, изјави дека „намерните напади“ врз центарот на Киев, како и нападите врз Запорожје на југ и Дњепар во централна Украина, се уште еден доказ за „терористичката неадекватност на Кремљ“.

– Русија не е способна да се бори на бојното поле, но е способна да убива цивили. Наместо разговори, потребна ни е противвоздушна одбрана, МЛРС, ракети со поголем дострел, нагласи тој.