Зголемено ниво на комунална бучава во Куманово

Специјалистот по хигиена од оваа јавна здравствена установа, доктор Мимоза Величковски, денеска информираше дека граничните вредности се зголемени од пет до десет децибили над дозволеното ниво.

 

Најголем причинител за бучавата е сообраќајот, по кој следуваат градежните активности, рестораните, верските објекти, веселбите... Колку од бучавата населението перцепира зависи од тоа колку време поминува  во домот, каква е звучната изолација, ориентираноста на зградата, а важно е и во кој период е бучавата, изјави Величковски.

 

Најниско ниво, според правилникот, е потребно да има во првиот степен каде што се сместени здравствените установи, додека највисокото е дозволено во четвртиот каде се сместени индустриските зони.

 

Здравствените ефекти од преголемата изложеност на населението од бучавата коишто ги предизвикува зголемената комунална бучава, додава др.Величковски, се одредуваат според индикаторите за бучава.

 

- Тоа е пореметување на сонот, потешко заспивање, будење во текот на спиењето и појава на возмениреност, објасни Величковски.

 

Постојат, објасни, и други фактори кои одредуваат колку бучавата влијае врз популацијата, а тука, е и субјективното чувство за бучавата и колку влијае вознемирувачки. Вознемиреноста од бучавата, укажа Величковски, може постепено да доведе до зголемувањето на крвниот притисок, незадоволство, неуспешност во работата, слаба концентрација кај учениците во текот на работниот ден.

 

Како што истакна Величковски, студијата којашто ќе ја прават во соработка со локалната самоуправа најдобро ќе покаже кои се здравствените ефекти кои ги предизвикува зголемената бучава врз популацијата.

 

Мерењата на бучавата се спроведуваат два пати годишно на десет локации во градот, одредени  во соработка со Министерството за животна средина и просторно планирање.