Балкан
7. November 2016 - 8:40

Црногорскиот парламент денеска ќе одржи конститутивна седница

Во Подгорица денеска ќе биде одржана конститутивна седница на црногорскиот парламент, а на дневен ред ќе биде Извештајот на Државната изборна комисија (ДИК) за резултатите од изборите, одржани на 16 октомври. 

Пратениците би требало да изберат претседател и потпретседател на Собранието, како и претседател и членови на Административниот одбор. 

Опозицијата најави дека нема да присуствува на седницата, оти оценува дека изборите не се одржани во слободна, фер и демократска атмосфера. 

Опозицијата, имено, смета дека апсењето на дваесетмината српски државјани осомничени за тероризам и обид за ликвидација на актуелниот премиер Мило Ѓукановиќ на денот на изборите, придонело за подобрите резултати на владејачката Демократска партија на социјалистите (ДПС). 

Првата седница на парламентот ја свика претседателот во заминување Дарко Пајовиќ, а ќе преседава најстариот пратеник Марија Чатовиќ. 

Црногорскиот парламент има 81 пратеник. 

Според резултатите на изборите одржани на 16 октомври, ДПС освои 36 мандати, Демократскиот фронт 18, Големата коалиција Клуч - девет мандати, Демократите осум, а Социјалдемократската партија четири мандати. 

Социјалдемократите и Бошњачката партија ќе имаат по два пратеници, додека коалицијата „Албанци одлучно“ и Хрватската граѓанска во еден пратеник. 

ДПС го истакна Душко Марковиќ, заменик претседателот на партијата, за мандатар, а претседателот на државата Филип Вујановиќ најави дека за тоа ќе одлучи по консултација со сите партии. 

Вујановиќ консултациите со партиите ќе ги почне по конституирањето на парламетот. 

Како што јавија црногорските медиуми, кои се повикуваат на владејачката ДПС, новата Влада може да биде формирана за половина месец.