Македонија
5. September 2015 - 14:28

„Македонски шуми“ во Струга има доволни количини огревно дрво

Цената на огревното дрво е непроменета, а подружницата на ЈП „Македонски шуми“ во Струга има доволни количини, информира директорот Жарко Бебекоски.

Испораката, според него, се врши за 10 до 15 дена од уплатата.

-  Во моментот има над 3.000 метри кубни залиха огревно дрво. Цената на огревното дрво во „Македонски шуми“ остана непроменета, метар квадратен бука е 2.371 денар, а граѓаните може да обезбедат во секое време во подружницата „Јабланица“, каде има доволни количини, изјави Бебекоски.

Побарувачката е зголемена во последниот месец. - Правиме напори да го интензивираме транспортот за навреме да ги снабдиме граѓаните со огревно дрво, нагласи Бебекоски, додавајќи дека во моментот располагаат  само со бука, определните количини даб за годинава завршиле.

Кражбата на огревно дрво во Струга и Струшко, во последно време, рече, е намаелна. - Со акцијата „Гора“ имаше неколку кривични пријави. Има доста одземени возила на дрвокрадци и мислам дека во последниот период нелегалната сеча е е намалена во однос на претходните години, напомена Бебекоски.

Голема контрола врз дрвокрадците имале со камерата што беше поставена во близина на селото Вишни, а неодамна беше украдена, но посочи дека прават максимални напори за заштита на шумите.