Свет
15. October 2015 - 12:14

Малезија ќе бара меѓународен суд за виновниците за соборениот авион над Украина

Малезиските власти имаат намера да побараат формирање меѓународен суд, што ќе ги казни виновниците за соборувањето на боингот на „Малезиан ерлајнс“ над источна Украина, минатата година, пренесе ТАСС, цитирајќи го малезискиот весник „Стар“. 

Малезискиот министер за транспорт, Лиоу Тионг Лаи, од Пекинг, каде се наоѓа во официјална посета, изјави дека треба да има меѓународна структура која ќе го разгледа прашањето за вината, затоа што доколку предметот се гледа од национален суд прашање е дали Малезија ќе успее да издејствува екстрадирање на виновниците.

Повикувајќи се на наодите од холандската истрага за несреќата, министерот кажа дека соборувањето на авионот е злостроство за кое треба да се побара кривична одговорност.