Балкан
26. October 2015 - 8:37

На Балканот капацитети за 50.000 мигранти, Фронтекс ќе биде на границата меѓу Србија и Хрватска

Прифатните капацитети во Грција и на Западен Балкан ќе бидат зголемени на 100.000 места, од кои 50.000 ќе бидат само во Грција, а припадниците на европската агенција Фронтекс ќе ги надгледуваат граничните премини и регистрацијата на точките на премини меѓу Србија и Хрватска, се одлучи на мини самитот во Брисел за мигрантската криза.

Европската унија и лидерите на балканските земји доцна синоќа во Брисел договорија план во 17 точки за заедничко решавање на работите околу огромниот прилив на бегалци преку Балканскиот Полуостров, информира рано утринава Европската комисија, а пренесоа британските медиуми.

Целта е, пренесуваат американските медиуми, да за забави движењето на десетиците илјади мигранти.

Една од поважните мерки, пишува Танјуг, е во Грција до крајот на годината да се зголемат прифатните капацитети за 30.000 места, а Агенцијата за бегалци на Обединетите нации (УНХЦР) во Грција да обезбеди уште 20.000 места.

Покрај тоа, ќе се инсистира создавање дополнителен капацитет за прифат на 50.000 лица во земјите северно од Грција, што значи вкупно 100.000 долж западната балканска маршрута и Грција.

Предвидена е поддршка за пограничната агенција на ЕУ - Фронтекс, на границата меѓу Бугарија и Турција, како и да се утврдат задолженијата за Фронтекс на надворешните копнени граници меѓу Грција и Македонија, како и меѓу Грција и Албанија, со фокус врз контролата на премините и регистрирање на бегалците кои не се регистрирани во Грција.

Договорено е, во соработка со Фронтекс да се детектираат нерегуларните гранични премини и да се помогне во регистрацијата на мигрантите и земањето отисоци од прсти во Хрватска. 

Една од мерките е воздржување од олеснување на движењето на мигрантите на границата на другата земја. Во соопштението се наведува дека не е прифатливо бегалците да се „префрлаат“ кај другата земја.

Меѓу мерките  е и ангажирањето на уште 400 полицајци во Словенија во рок од само една недела, како и засилување на напорите за олеснување на враќањето на мигрантите на кои не им треба меѓународна заштита и засилување на соработката за репатријација со Авганистан, Бангладеш, Ирак и Пакистан.

На повисоко ниво ќе се крене и заедничката поморска операција „Посејдон“ во Грција, особено присуството на Фронтекс во Егејско Море и значајно ќе се засили поддршката за Фронтекс во Грција при регистрирање на мигрантите и земањето отисоци од прстите.

Воедено, треба да се утврдат контактни точки за дневна размена на информации кои се однесуваат на движењата на мигрантите, размена на информации за движењето и бројот на бегалци кои се движат. Во таа размена на податоци ќе бидат вклучени Фронтекс и канцеларијата на ЕУ за азил - ЕСАО.

Предвидено е да се контактираат и финансиските институции, вклучувајќи ја Европската инвестициска банка, Европската банка за обнова и развој, се со цел да се обезбедат финансиски средства за прифат на бегалци.